الجمعة، 25 مايو، 2012

تختر آخر زمن !!


الدكتور: خير .. أيش فيبك يا حجة؟؟

نادية شجن :أني أجيتلك يا ابي عشان انت تقولي ايش فيبي ..

الدكتور : طيب ممكن توصفيلي ايش الأعراض اللي حسيتيبه أمس؟

نادية شجن : سعله.. وزكمة.. كمان محمومة.

الدكتور: يعني عارفة بنفسك كل الأعراض .. ما شاء الله..

ماهيتاب : تصدقي ماكانش في داعي تجي يا نادية.

الدكتور: تعبت نفسه والله..

حواء : اوووو ..  يا بني يشتيلك كيله ملح

نادية شجن : مله اسمعني للاخير قبل ما اردعك واطلعلك عردود براسك .. اني تعبانه مافيبيش
               طافه للوك حقك ..

الدكتور : طيب يا حجة اهدئي قبل ما يشطبتلك عرق.. ها كملي..

نادية شجن : قلتلك سعلة، زكام، حمى وطرش وسيل..

الدكتور : طيب لحظة، بتصل اتصال ضروري..

ماهيتاب : عاده بيتحازي بالتلفون .. قدني اقولكم من أول.. بنروح بيت الهاشمي شكله فجعة
             لابعيد.

الدكتور : الو .. ماجد كيف حالك .. اسمع ادخل الفيس بوك .. اشتي اسئلك على حالة اجتلي
            المستشفى..

حواء : مصله دا الحيسا بوك

ماهيتاب : مدري خاف نوع بشكاري جديد.

الدكتور : ماهلكش بالفيس .. خلاص امري لله بتخسرنا وحدات.. المهم اسمعنا المريضة فيبه ..حمى و سيل وطرش..

نادية شجن : أيوة وغاتي..

الدكتور: حمى الضنك.

ماهيتاب : ودا معدي يا تختر.

الدكتور: جدا.

حواء : ماهيتاب سنفري بحياتك.

نادية شجن : والله ماقمتوا يا نموت سوا يا نعيش سوا.

ماهيتاب : شوفي .. حبني بالغصب.

الدكتور : لحظة يا جماعة طلع مافيبيش حمى الضنك.

نادية شجن : الحمد لله

الدكتور : لأنه مع السعلة يمكن يكون فيبه التهاب بالسحايا

حواء : يا حافظ يا حفيظ .. مصله دا

ماهيتاب : لا دا الأسم كبير .. شكلك بتشتلي يا نادية.

الدكتور : أو .. ممكن يكون سرطان الدم.

نادية شجن : أو يجعلك سرطان يقبصك بهامتك .. شوفوا اللي جالس يتخورلي أمراض.

الدكتور : ومع الزكمة  احتمال يكون إيدز..

نادية شجن : يا فضيحتي.. على أخر عمري يصطلحبي ايدز .. قده سرطان الدم كان احسن    
               يارب، عالاقل باموت مستورة.. قبل ما يطربوبي هذونا التنتين.

حواء : ايدز مرة واحد .. يا مفتري.. من فين بيجي الإيدز لنادية الحرمة متقية ومصلية
       ولاتقطع فرض.

ماهيتاب : وبحق الله 24 ساعة قدام عيوننا..

الدكتور : خاف من الحلاقة..

حواء : طلعتي تهبيله موس يا نادية !!

ماهيتاب : عيب عليك يا بني مو جابه الإيدز.

الدكتور : مله ماجد قال كدا..

حواء : منو ماجد دا؟؟

الدكتور : صاحبي اللي كنت اهادره بالتلفون..

ماهيتاب : هذا الليد اني ماعجبنيش..

حواء : اسمع يا ابني انت متأكد انك تختر..

الدكتور : طيب اسمعوا انا بعملكم تخفيض وباسجل انه فيبه جازعة ..

ماهيتاب : جزع فوق كرشك هيلوكس .. شوفو اللي يلاعبنحنا دُرّة ميزان ..

نادية شجن : حريم .. دا كتربه .. أني فيبي إيدز يا مكسورالناموس ..امسكونه يا حريم بافُـتّه
               وباخبز..

الدكتور : أيش بتسووبي .. يا ناس يا مسلمين..

نادية شجن : اتشهد على روحك يا "تختر آخر زمن" .. حريم .. واحد .. إثنين .. ثلاثة ..
               هجووووم..

عمرو جمال


الأحد، 13 مايو، 2012

شعب "قالولي" !!


نادية شجن : ويه .. يا بنت .. مو معك تلوبي من أول تحت طاقتي ؟؟ 
 
نجوين :  أوووو .. خالة نادية مالك .. عاد الله بيراجعيك!!

نادية شجن : خالة نادية ؟؟ من فيت تعرفيني ياليده؟؟

نجوين : يا لوماه .. ما عرفتينيش يا خالة نادية؟

نادية شجن : وراسك اللي ما حلفبوش كدب أبدا لا أعرفك ولا أصرفك !!

نجوين : عيب عليك ياخالة أني نجوين .. 

نادية شجن : نجوين من؟؟

نجوين : تتزايدي يا خالة نادية ؟؟ أني نجوين سليمان ..

نادية شجن : أوووو بنت الست عتيقة بطاطة

نجوين : أيوووة .. الله ينّور عليك.

نادية شجن : مله انتي كمان مُصلبه .. كيف تشتيني أعرفك وإنتي مغرغرة من ساسك لراسك .. ليش أتنقبتي يا بنت ؟..

نجوين : إجراء احترازي ..

نادية شجن :  أيش دي الهدرة الكبيرة، إهدري معي دلا دلا وبالعربي الهدرة دي حق اصحاب جبوتي أني ما فهميش..

نجوين : بالعدني يا خالة البنويت كلهم اتنقبو عشان أصحاب القاعدة دخلو عدن ويطفشو أي وحدة مش منقبة بأسيد..

نادية شجن : يا باهوت يابن علوان !! من صدقك ؟؟..

 نجوين : صدقي ونص .. قد طفششو تنتين بنات بالشيخ عثمان ..

نادية شجن : لا حول ولا قوة إلا بالله .. يعني النقاب بالغصب والا كيف؟ .. والبنات اللي طفشوهم كيف استوو؟

نجوين  : واحدة ماتت والتانية مريضه بحاله..

نادية شجن : قهري عليك يا عدن .. فين بيروحو من ربنا دونّا؟؟

نجوين : يروحو حيت ما يروحو .. أني اتنقبت وبنات كتير اتنقبو ما فيبناش طافه .. قدنحنا ملاح محسنحنا لا عاد يجوش اصحاب القاعده يغلقو الباقي..

نادية شجن : على خروعه .. دحين دوناّ بيخوفوكم ؟؟

نجوين : أيش من خروعة .. المدرسة حق بنت أختي الصغيرة أجالهم تهديد انه أي بنت أو مدرسة بالمدرسة مش منقبه بيطفشونه بأسيد  والمديرة جمعت البنات وقالت إنه مش مسئولة عن أي بنت مش منقبة لو حصل له شي.

نادية شجن : إخص عليها وعليكم يا جبناء.

نجوين : يا خالة دا عمر .. والنفس حُبيبه .. ونحن مش مستغنيين عن أعمارنا ..  تصدقي حتى بطلنا نروح  الكورنيش ..

نادية شجن :  ليش ؟؟ خاف حتى حرمو التمشية؟

نجوين : الإسبوع اللي فات ضربو عايلة كانت جالسة بكورنيش المنصورة .. شكو فيبهم قامو ضربوهم ..

نادية شجن : كدا زجى ؟؟ كل من شكو فيبه ضربونه؟ ..

نجوين : وقتلو أخو عصام غريري الطباخ .. وقتلو واحد تاني أيش لو شفتي كيف دبحونه بيزربك ديميك..

نادية شجن : اووو أيش دي القصص .. حتى الأفلام الهندي مش كدا .. كي هاتي الفيديو باشوف كيف دبحونه عشان  يزترب ديمي.

نجوين : أني مش معي الفيديو ولا شفته يا خالة..

نادية شجن : وكيف تقولي إنه زرب لك ديمك؟؟

نجوين : أني ما شفتش بس قالولي..

نادية شجن : هااا .. والبنتين اللي طفشوهم بالشيخ عتمان تعرفيهم؟؟

نجوين : لا بس ناس موثوق فيبهم قالولي..

نادية شجن : والعايله اللي ضربونه بالكورنيش .. تعريفيهم؟.

نجوين :  لا بس مصادر مطلعة هم اللي قالولي.

نادية شجن : واللي استوى بمدرسة بنت أختك .. أكيد بنت أختك قصتلك..

نجوين : تشتي الصدق .. بنت أختي قد له شهور ما تروحش المدرسة .. بس شهود عيان قالولي..

نادية شجن : وطبعاً حق أخو عصام غريري برضه الناس قالوليك؟ ويه .. نجوين قالولي ..  دحين انتي دابشة الدنيا دبش واتنقبتي وسويتي دا كله وانتي ما شفتيش حاجة بعينك .. كيف لو كنتي شفتي أيش كنتي بتسوي..

نجوين : خالة نادية فيبك طافة للمناجمة .. أني أنصحك لوجه الله اتنقبي وقري ببيتك قبل ما يستويبك حاجة .. يالله مع السلامة..

نادية شجن : أني لا بتنقب ولا بقر ببيتي .. لو باتنقب باتنقب بقناعتي برغبتي بيني وبين ربي مش عشان الناس .. ومش عشان حد جبرني .. ومحد بيفرض عليا كيف أعيش ولا بستسلم .. نحنا استسلمنا كثير مرات من قبل وضيعنا كل شي، حتى السلى ما عاد نشوفوش بعيون الناس .. بس صدقيني .. لو بعتو حياتكم دي المرة وما قاومتوش .. لا تدوروش عليها مرة تاني ..


الأحد، 6 مايو، 2012

تلفزيون .. زَرَق بَرَق !!


نادية شجن : منورات يا حريم، كم لكم ماتجوش تبيتو عندي.. ها شلو قليل دُبة ..

ماهيتاب : والله فكرة حلوة كل خميس نبيت عند واحدة ونجلس نتحازي ونحش لما الفجر.. ها امسكو قليل حنظل..


حواء : أهم شي تقومي الصبح يا نادية تسويلي جبيز .. خلاص بينقرض ولا عاد في حد يسوي جبيز دي اليومتين .. ها امسكو لوز..

نادية شجن: هيا اتفرجوا .. اتفرجوا.. محسنه محمد سعد عبدالله .. الله يرحمه ويبرد على ترابه.. مكانه كان يصور الأغاني حقه وهو جمب الورود والشجر.. 

حواء : محسنه محمد سعد يعجبني .. ولو غنى بين ورود والا بصحراء الربع الخالي .. مكانه يجنن من قلب قلبه


ماهيتاب : قده دا شغلهم أصحاب القنوات المحلية من زمان .. ورود وشجر وحدايق مافيبهمش طافة يشتغلو.. وبعدين دي الوردة تشوفونه اللي هناك .. وربي دخلت التاريخ.. صور جمبه محمد سعد وأمل كعدل وأحمد قاسم و أيوب طارش والعزاني و المرشدي ..

حواء : صدقك يا ماهيتاب كلهم جنب الشجر وجنب الورود.. بين الشجر وبين الورد .. تحت الشجر وتحت الورود.. فوق الشجر وفوق الورود..

ماهيتاب : من صدق والله .. حتى لما تفتحي البرامج حقنا بالقنوات المحلية، داخل الاستديو المذيع جنبه ورود وشجر اصطناعي و وراه ورود وشجر اصطناعي.. وفوقه وورد وشجر اصطناعي..

نادية شجن: وبعدين تقلبي من قناة لقناة .. طول الوقت بتلاقيهم يغنو ويرقصو .. ودبيج ارصاع .. دبيج ارصاع.. ويا رقص.. وياشرح .. ويابرع .. اللي بيتفرج من برع بيقولو شعب فنق من داخل قلبه..
 
حواء: مش دارين انحنا مكملين كبايد.. وإلا اللبس اللي لابسينله اللي يرقصو واللي يطبلو .. كله الوان الوان يابن علوان .. ومساكين تعابا مخوقين يشتيلهم دريبات تغذية..

نادية شجن: و كأنه مافيش معاهم الا جلسات اغاني من حق ايام حرب الزماميط .. خزوبنحنا الله يخزيهم..
               
ماهيتاب : والا المذيعات والممثلات اللي لابسين كوريشة وقشاقش كما العرايس الروسي والمكياج الي مطلطلين به وجوههم كما المهرجين..

نادية شجن: من صدق خزا .. ايش بيقولو علينا الأجانب .. كي اسكتو كربتوني التنتين ماعاد اشتيش اتفرج حاجة..

حواء : وعاده دي الأيام الخزى إلا زايد .. القنوات كله فتن وكدب وسياسة وسخة..

ماهيتاب : أح بس أح .. وكل قناة متعصبه للحزب حقه وإلا للجهة اللي تتبعه .. ويا ويل حد يختلف معاهم بالرأي .. بيشوهو سمعته وبيصوروا للناس إنه إبليس الرجيم.

نادية شجن: وإلا الكذب والتلفيق والمبالغات .. والألفاظ اللي عمري ما سمعته .. وكل واحد يشتم التاني وكل واحد يخوّن التاني .. شيء يوجع القلب..

ماهيتاب : بس بلا مكاربة .. قده محسن نحنا من اول نتفرج الأغاني حق زمان اللي ترد الروح .. ونحش على الزَرَق بَرَق لما ورم جنصي من الضحك .. موجابه الهدرة الي توجع القلب دحين..

نادية شجن: من صدق .. اسمعو طفو التلفزيون والسراج خلونحنا نرقد عشان نقوم نصلي  صلاة الفجر حاضر.

حواء : أيوة أحسن قومي طفي السراج..  قده غلاس، بنرقد عشان نقوم نصلح الجبيز قبل ما ننسي كيف يجي طعمه .. كما نسينا حاجات حلوة كثير ..

عمرو جمال