نادية شجن : دحين ماله الحافة تصفر .. من الصبح وأني أدور خبارة كدا ولا كدا .. تبرد قلبي وتهدي الشجن اللي فيبي .. لعد يكون اليوم جمعة واني مش زاهدة .. أووو منو دا اللي يتسحبب كما السرق من بعيد؟؟ .. أووو دا ممدوح ابن عتوق أم الخمير .. أيش مخبي ورا ظهره؟ .. من صغره وهو زُنقلي .. باتخبي باشوفه من خزق التاقة ليش يتسحبب وبعدين برجع أبغته..
ممدوح : إن شاء الله ما تكونش هله نادية شجن .. الواحد من بعده مايعرفش يجزع بهذي الحافة بأمان الله..
نادية شجن : ممدوح .. كيفك؟
ممدوح : سلام قول من رب رحيم .. أووووه خالة نادية .. البداية السعيدة لكل يوم في هذي الحافة..
نادية شجن : صباح الخير يا ابني.
ممدوح : صباح البغايت والفجايع من صبح ربي ..
نادية شجن : فاجأتك صح .. أيش رأيك بالمفاجأة؟؟
ممدوح : تجنجن .. أحلى مفاجأة .. بس كوني إتنحنحي المرة الواجيه .. دلا دلا فيبي.
نادية شجن : المهم قولي أيش قيمك من فجر ربي؟ .. ومن فين واجي ؟عادك مروح دحين .. أيش خاف طول الليل برع؟.
ممدوح : الشقى يا خالة .. لقمة العيش .. رايح أدور شغل..
نادية شجن : رايح ؟؟ واني احسبك مروح.. على فكرة دا طريق المروح مش طريق الروحة يا ممدوح.. بعدين مو من شغل دا اللي الساعة 6 الصبح؟؟
ممدوح : هاااا .. ايش تحسبي .. مش يقولوا صابح القوم ولا تماسيهم؟
نادية شجن : وأنت خاف رايح تصابح المدراء حقنا حق المرافق ؟؟ قدهم يجو الساعة 11 ويروحو الساعة 12 ونص بعد الصلاة .. ساني لا سوق القات وصلى الله وبارك.. لا تزيد عليا ولا أزيد عليك .. قر وأعترف .. أيش معك بالشارع الساعة ست الصبح؟؟
ممدوح : أيش لك مني .. أيش لك المعقلة .. أخرج وقت ما أشتي أنا حر .. بعدين دا يسمونه الاجتهاد يا خالة .. ولكل مجتهد نصيب ..
نادية شجن : على من يا دهمس ؟؟ ايش دا اللي مخبيهو ورا ظهرك ؟؟
ممدوح : ها ؟؟ فين ؟؟ ولا حاجة يا خالة .. يلا مع السلامة.
نادية شجن : مش إلا رايح تدور شغل؟ .. ومالك مروح للبيت .. قول إلا مروح من الشغل .. طول الليل وأنت تشتغل .. نقفت الكيبلات حق الكامبات كله اللي بالبلاد..
ممدوح : أنا ؟؟ .. كيبلات؟؟ .. أيش من كيبلات يا خالة؟؟
نادية شجن : أيوووة .. أيش بتنكر .. قدني أشوفك كل يوم بالناظور حقي اللي بياكلونه الدود ..
ممدوح : مله مش أنا بس يا خالة .. حتى سليم الأصلع وعادل أبو ميسي وناجي باندا .. ماشفتينا إلا أنا.. هيا لكنك .. يا كلنا يا فجره.. أنا جيزي جيز الناس..
نادية شجن : بس لا عاد تفجرش حاجة .. اني شفتك أنت .. وعادك تروح تبيعهم هم والجلوبات حق الكامبات.
ممدوح : بس؟
نادية شجن : إلا وبراميل الكدافة الحديد الصغار حق البلدية.
ممدوح : بس؟
نادية شجن : والحدايد حق الشوارع .. يا سارق..
ممدوح : مله يا خالة دي حاجات صغيرة يعني ماليش أهمية بالحياة.
نادية شجن : أو كيف ماليش أهمية بالحياة يا سارق .. الحوافي غدرة بلا كامبات معد اقدرش استضي كما الناس من اللي داخل ومن اللي خارج بالحافة.. والكداديف تنقفوهم والبلاد مش ناقصة وساخة .. قده الشعب ما شاء الله عله نظيييف ولا يعجبه يوسخ البراميل .. نظاف كما يوم ماركبوهم .. أصلا الناس مؤدبين مايكسروش يجدلو داخل البرميل يجدلو بالكدافة جمب البرميل بالأرض .. والله ما ارحم إلا عمال النظافة .. أكثر ناس يشقوا بالبلاد واقل ناس يحصلوا رواتب .. الله يعينهم ويجازي من كان السبب..
ممدوح : ايش من سرقة يا حجة .. قلبتينا سارق .. با تجيبيلي سُمعه .. هذي حق الحكومة يعني ما تعتبرش سرقه .. من ظهر الحكومة حلال يا خالة..
نادية شجن : أو شوفوا .. مفتي الديار اللي بيحلله .. قده اسمه سرقة وعادك بتكابر.. تأكل أهل بيتك حرام يا سارق.
ممدوح : هيا لكنك .. بلا مزايدة .. شفتينا إلا أنا؟ .. ما شفتيش السرقة اللي على أصوله نحنا إلا نشل حاجات صغيرة على قدنا .. فين نحنا من التجار و المسائيل الكبار اللي ناهبين البلاد نهب ويسرقوا السرقة على أصوله .. أما نحنا مساكين الله نص مننا بلا شغل والنص الثاني راتبه يلا يكفي فاتورة المي والكهربا .. لو مانسويش كدا بنموت جوع .. هم علمونحنا السرقة من زمان .. وإلا ناسية العاقل حقهم لما قال لنا زمان " إتقلبوووو "..
نادية شجن : قلبو سرجك وسرجه بيوم واحد .. عليك ماتستحي ..أخص عليك يا ممدوح .. قده اسمه سرقة .. كدا وإلا كداك .. اللي يسرق حديده زي اللي يسرق حزام ذهب .. اسمه سرقة لا تبرر ولا تكابر..
ممدوح : يا خالة انتي مزايدة .. أنا قد قلتلك جيزي جيز الناس .. خليلي حالي اتقرصلي العافية.. مع السلامة ..
نادية شجن : العافية دي ولا بتشوفه وانت تاكل حرام .. أيش الزمان الأغبر دا اللي رجعنا فيبه نواجه الغلط بالغلط .. كنا زمان نقول جيزي جيز الناس في الحاجة الحلوة واليوم نقوله في الحاجة البطالة .. هيا مع السلامة يا ابني و ربي يهديني و يهديك..
عمرو جمال
ليست هناك تعليقات:
إرسال تعليق