خلي السلاح .. راقد !!

نادية شجن : هلوووز .. عرفتوني؟ أني "نادية شجن" .. يعجبني أجلس بالطاقة وأتشجن على اللي رايح واللي واجي بالحافة .. لو تروح عليا خُبارة أموت من القهر.. المهم يا مسمكم اليوم اني كنت راقدة بهدي وندي وفراشي ومخدي، لما سمعت صوت الرصاص خزق دربوجة أدوني.. قمت مفشولة اجري للتاقة عشان أشوف منو دا مكسور الناموس  اللي فزني من أحلى نومة؟

علاء : برشا برشا يا مدلل .. برشا برشا ..

نادية شجن : برشو راسك كما يبرشو الجبن المالح .. أووو يالله، ما هو دا البندق اللي بيدك؟؟ جالس تضرب رصاص فزيتني من النوم قلت يمكن الحرب الأهلية اندلعن.

علاء : ايش من حرب يا خالة نادية؟ هذي البرشلونة فازت وجالسين نقرح طماش ونضرب رصاص من الفرحة.

نادية شجن : أوووو يا حافظ .. مصله دا البرُش التونا ؟

علاء : أيش من برُش تونا يا خالة .. برشلونة.. دا فريق كبه.

نادية شجن : مله يجعلكم إزالة .. منشان فريق كبه فاز بالدوري تقرحوا دا الرصاص كله.

علاء : هيا لكنك يا خالة، أجت عليا أنا .. الأمة كله دي اليومتين كل ما فرحو قليل قرحو باكت رصاص.. موضة يا خالة موضة..

نادية شجن: على حالك مازكنتاش.. والله من صدق دونا اليومتين كل ما واحد اتعروس والا صنف كدا تصنيفة من راسه  قام يضربلك رصاص مليانت الحافة لما يفاقشنحنا .. لكن امركم لله تبهدلو بعدن كدا .. من فين كنا نعرف بعدن كما دي الخبابير المبعولة.

علاء : ياااح يا خالة .. الناس كلهم اقتلبو مسلحين والسلاح مليانت السوق يابلاشاه تلاقيهو بالسعر اللي تشتي.. "يخافسه" وكمان يقولك انه في ناس الله اعلم من فين يوزعوا السلاح على الشباب.

نادية شجن : مله يجعله كسر بيده اللي يفرق البنادق والأوالي على الشبيلة.. يا ابني عيب عليكم هذا بندر عدن طول عمره متمدن و حلا ودلا .. لا شفنا واحد حامل فرد ولا بندق ولا آلي.. لكن المصيبة مالقيتوش ضابط يضبطكم.

علاء : أيش من ضابط يا خاله، البلاد مفلته و يقولك نعم البلاد داخلة حرب أهلية وكل واحد لازم يخبي سلاح احتياط لوقت الضرورة.

نادية شجن : اني افدا لقفك، لوقت الضرورة يعني احتياط، يعني لا حلت .. بامرطه مؤقتاً .. اللي معه سلاح يخبيهو ببيته ما يخرجبوش الشارع وكلما اصطلحت حاجة قمتو تهبوله واقح وا بوم.. حرام عليكم.. لاتبهدلو بعدن قدو اللي بهدلوبه مش قليل، مايقعش نحنا كمان نغلق الباقي.. وعلى قولة عبدالحليم حافظ الله يرحمه ويبرد على ترابه "خلي السلاح .. راقد".

علاء : صاحي .. قال صاحي يا خالة.

نادية شجن : منشان عدن بنرقده .. دي "عدن" مش قليل يا نظري .. وأول ما تستقر الدنيا .. اني بنفسي باخرج اعتصم لما يمنعو دخول السلاح لعدن .. عدن دي جنة والجنة مايقعش فيبه سلاح .. وعلى قولة أبوبكر سالم "دي جنة الدنيا .. حواها كل فن".

عمرو جمال