عدن .. بالمتر باعوها !!

 نادية شجن : هلوووز .. عرفتوني؟ أني "نادية شجن" .. يعجبني أجلس بالطاقة وأتشجن على اللي رايح واللي واجي بالحافة .. لو تروح عليا خُبارة أموت من القهر.. أووو .. منو دونا البنويت  أووو .. هدونا بنات نرجس الدلالة.. الصراحة ما عجبونيش .. لهم اسبوعين يخرجو العصر ويروحوا المغرب ومعاهم الشاهي والبسكت والكيك والفوفل ملبس .. اني قتلني الشجن .. بسألهم لافين رايحات .. ويه يا بنات نرجس الدلالة.. 

 نوال : خالة نادية .. كيفيك .. أيش أخباريك؟؟

نادية شجن : حلا ولوق وسكر مدقوق ما فيش مني إثنين بالسوق.. كيفكم يا بناتي.. وكيف أمكم نرجس؟؟

دلال : الحمدلله ياخالة .. أمي دايما تذكرك بالخير..

نادية شجن : تذكرني بالخير ؟؟ كيف له ؟؟ مع انه أكبر حشاشة ؟؟ المهم يا بناتي مالي ومال امكم نرجس .. اسمعوني، أني قتلني الشجن ؟؟ أصلاً أني كل يوم جالسة بالتاقة و أشوفكم يوم ويوم لا .. تخرجو من البيت بعد صلاة العصر وانتو محملين الشاهي والكيك والبسكت والفوفل ملبس .. وترجعو بعد صلاة المغرب .. فين تروحو؟

نوال : أني وأختي؟؟

نادية شجن : أيوة .. أنتو التنتين..

دلال : أني وهي؟؟

نادية شجن: أيوة .. أنتي وهي .. بلا فحس..

نوال : كل يوم أحد وثلوث وخميس..

نادية شجن : على لوك .. اشهدو على بنات نرجس يا ناس .. أيوة كل أحد وثلوث وخميس..

دلال : قصدك، أني و أختي فين نروح كل أحد وثلوث وخميس بعد صلاة العصر؟

نادية شجن : ويه بنات نرجس مش عليا هذي المرفالة .. جالسات تتشاوطوبي .. جلعتوني التنتين يجعلكم لغبة بحانجركم .. بتهبولي الخبارة دحين وإلا أنزل أكوشكم مليانت الحافة ؟؟

نوال : خلاص .. خلاص يا خالة نادية .. نحن بس نضحك معيك.

نادية شجن : سترك جبرك يابنتي لاتضاحكيني ولا اضاحك.. خارجوني و خلوني أقفز التاقة التانية اشوف عبد القوي ومرته اتطلقوا وإلا عادهم .. من أمس الليل وهم وا صياح كما السلطة والمعارضة ..

دلال : القصة ومافيها يا خالة أنه نحنا نشل أكل وشاهي ونروح نفرش جنب البحر بالبقعة اللي بعد عدن مول..

نادية شجن : أيوة .. ومو جابه الفنق  دي اليومتين؟؟

نوال : يا خالة، الجماعة الله لا يوفقهم قد سدو علينا البحر من كل جهة ولا بقو لنا بعدن ولا متنفس نشوف منه البحر.

نادية شجن : صدقك يا بنتي .. نهبو عدن نهب .. ولا بقو بحر الا وسدونه علينا .. ولا جبل الا وقرمونه.. ولا بقعة الا وبسطوا عليها .. حتى الجلي اللي ورا بيتي أجا واحد شيخ مشايخ مندري أيش من قبيلة  قال حقه.. يجعله كسر بحقوه لا هو صدق..

دلال : دحين نحن مجموعة شباب من عيال وبنات عدن اتفقنا نروح كل يوم أحد وثلوث وخميس نجلس هناك بالبقعة، اللي يفرش هو وعائلته ، واللي يلعبو كبة ، واللي يجيب جهاله يمشيهم هناك.

نوال : عشان نوصل لهم رسالة أن الأرض دي أرضنا والبحر دا بحرنا ولا حد بيحرمنحنا منه.

نادية شجن : أأح بس أأح .. ما كذبش اللي قال عدن بالمتر باعوها .. ما عاد باقي معانا الا هذيك البقعة اللي نشوف منه البحر ..

دلال : أسكتي يا خالة ، وعادك لو شفتي كيف حفروا الأرضية بيوجعيك قلبك.

نادية شجن : أووووو .. مله ربي يجعل لكل من حفر حفرة في أرضك يا عدن حفرة بقلبه تجيب أجله.

نوال ودلال : آآآآآآآآآآمين يارب.

نادية شجن : ويه بناتي .. راعولي قليل بلبس شيدري .. وبنقفز الأغبري بنشل بسكت لبن وبسكت شمر وبا نروح نتفلحس هناك .. وخلي حد يقرب وإلا يحفر هناك .. با ردعه ردعة  وبادهفة بالحفرة وباكبسه وباقري الفاتحة على روحه .. 

دلال : هيا بسرعة يا خالة عشان ما نتأخرش..

نادية شجن : ولا يهمكم ..أني معاكم .. كل أحد وثلوث وخميس .. دي عدن .. وعشانه يرخص الغالي والنفيس..

عمرو جمال