مخرب غلب ألف مدّار !!

 نادية شجن : هلوووز .. كيفكم .. فقدتلكم .. لي أسبوع ما شفتكمش .. كيه كل واحد منكم يقص لي أيش أستوى معه الإسبوع اللي راح .. ويه حسكم تصدقوني ..  أضحك معاكم .. مافيبيش طافة أتسمع قصصكم كلكم ..  أووو يا ساتر أستر .. منو دونا اللي يتصايحو ملينات الحافة .. نوال بنت نرجس الدلالة وفطوم قلاقل ..  أم الصبيان هذي الحرمة اللي اسمه فطوم مصيبة صوبة ولا تبتلع لي..

 نوال : وربي يا فطوم لو ما بطلتيش حقك الخبابير دي با شمتبك بعدن كله مديرية مديرية .. شارع شارع .. حافة حافة .. زغط زغط.

نادية شجن : ويه نوال القذافي .. أيش في أيش حصل يا أمي قوليلي قبل ما أموت من الشجن يا فدوبني عليك؟

فطوم : ولا في شي يا نادية .. إلا كلمة الحق تزعل دي اليومتين .. واني كله إلا كلمة الحق ..

نادية شجن : إنتي يجعلك كسر بحقوك مو معرفيكش .. خبز يدي والعجين .. أيش سوت مكسورة الناموس دي يا نوال يا بنتي..

نوال : يرضيك يا خالة .. كل ما سوينا شي أني وزملائي الناشطين .. تشكك فينا وفي ذمتنا وتروح تشوه سمعتنا عند الناس؟

نادية شجن : أكيد ما يرضينيش .. ياسين عليك وعلى زملائك .. شباب زي الورد أعرفهم واحد واحد..

نوال : جالسة تقول نعم الفلوس حق الطبق الخيري سرقناها وما وديناهاش للنزاحين..

فطوم: فين راحت البيس .. لهفتوها يا سرق .. تتاجروا باسم أصحاب أبين مساكين الله ..

نادية شجن : يجعلك كسر بلقفك يا كذابة .. البيس أجو قسمونه هنا جنبي .. واشتروبه فرشان وراشان للنازحين .. وشفتهم بحقي الناظور لما وصلوهم للمدرسة.

فطوم : انتي ماتعرفيهمش يا نادية .. قلبك طيب وتحسبي الناس طيبين مثلك..

نادية شجن : أوه منك يا فطوم قلاقل .. كيفيك لما تتمسكني تجيبيلي اللاصي..

نوال : وإلا يرضيك يا خالة نادية تقول علينا مزايدين واستلمنا بيس من المجلس المحلي لما نزلنا نكنس الشارع الرئيسي.. وماكافاهيش الكلام دا كله وعاده تقول علينا أمن قومي !!

فطوم : أيوة أمن قومي و مدسوسين كمان .. الله أعلم كم دفعولكم .. أني دارية بمخططكم .. تشتو تنظفو عشان تطلعو أصحاب الشارع الرئيسي وسخين وتبرروا للقتل .. أني دارية .

نادية شجن : يجعلك السمرقع لاهو صدق .. أيش دي الهدرة يا فطوم عيب عليك تتقولي على عيالنا وبناتنا كدا..

فطوم : قلبك طيب يا نادية..

نوال  : وكمان يا خالة تطرب بنا بكل مكان .. نعم نحنا اللي رحنا نوقف في البقعة بين عدن مول ومركيور رحنا نفاوض التجار اللي يتضاربوا على الأرض بـ 25 مليون ريال .

نادية شجن : يجعلك 25 مليون ورمة .. مالك يا فطوم تشوهي سمعة الشبان .. أني أروح معاهم كل أحد وثلوث وخميس .. شبان زي الورد يدخلو القلب بلا استئذان .. وواكنة فيبهم أكثر من نفسي.

فطوم : هيا الشبان دونا سمعتهم فاحت مليان عدن .. بس أنتي قلبك طيب وتحسبي الناس كلهم زيميك..

نادية شجن : فطوم قلاقل .. وربي وما أعبد .. وراسي وما ركبه .. إنه لو ماتبطليش حقك القلقلة با أنزلك دحين وباكنسبك الحافة..

فطوم  : هو إنتو كدا كلمة الحق توجعكم .. لكن باسيبلكم الحافة لكم وللجن..

نادية شجن : جني يلهفك .. ويريحنحنا منك.. حرمة مصيبة 

نوال : شفتي يا خالة.. كل يوم من دا الكلام .. كملونحنا اهانات وتخوينات واللي يزعل لما يجي الكلام من القريب مش من الغريب.. وربي احباااااط

نادية شجن : مالك من أبتهم كلهم .. وطالما إنكم ماشين صح ولا يهزكم ريح .. واللي يحبطوكم ويشوهو سمعتهم الله يهديهم وليتهم سمعو المثل اللي قال : مخرب غلب ألف مدّار*

*المدّار : صانع الفخار
 

عمرو جمال