من سبق .. لحق !!

 نادية شجن : أص .. أصه .. سكته .. يجعلك الصناج بأذونك ياللي صورتني .. منو دا اللي يدقدق تحت بيتي؟

 عبدالقوي : أنا يا خالة نادية.. لا تخافيش..

نادية شجن : هو إنتا يا عبدالقوي .. وأني اللي أحسب القاعدة دخلو عدن وقدهم يبنو متارس تحت بيتي..

عبدالقوي : فيبيك طافة للكاعة يا خالة نادية .. و أنا فوق راسي شغل الدنيا والآخرة..

نادية شجن : عجلو بآخرتك لا هو صدق .. أيش معك تحفر تحت بيتي يا عبد القوي؟؟

عبدالقوي : جالس أسوّر لي بقعة .. ما فيش وقت يا خالة نادية .. الحافة كله مسوّرة .. من سبق لحق؟؟

نادية شجن : عليك ما تستحي يا عبدالقوي يا بن شفيقة شلش .. بز سامانك من تحت بيتي قبل ما أنزل أهبلك حبتين تيكواندو أعدمك العافية .. شوف معي الحزام السوسني ..

عبدالقوي : خليلي حالي يا خالة نادية بروسلي .. جيزي جيز الشعب .. الناس كله ماسكة نورة وتخطط بقع .. بتجي عليا أنا وبتتفلسفي .. أسمعي في ورا بيت نجرس الدلالة بقعة فاضية أحجزلك ؟؟

نادية شجن : أني اللي بنزل أحجزلك بقعة بمجنة القطيع دحين لو ما تتحركش من تحت بيتي يا مكسور الناموس.

عبدالقوي : صدق اللي قال جزا المعروف سبعة كفوف.. عادنا أشتي أتجمل معك واحجزلك بقعة .. لا تقعيش هبلة يا خالة نادية .. 

نادية شجن : أيش عليك مني .. أني هبله وراضية بنفسي .. زمن أغبر اللي عايش بشرفه يسمونه أهبل ..

عبدالقوي : طيب .. اتلاكعي براحتك .. بس أنا بثبت لك إنك هبله .. فين الناظور حقك ؟

نادية شجن : إندكه .. فوق صدري .. مليانت العين كما السلس الحلبي.

عبدالقوي : هيا شلي لك لفة بالناظور دار مادار على عدن .. كي روحي سنا العقبة..

نادية شجن : أو .. أو .. الناس قدهم يبنو فوق العقبة .. والأمن يحرسهم .. دي لعبة مدبرة لا بعيد..

عبدالقوي : وعادك ماشفتيش حاجة .. إطلعي سنا الفرس ..

نادية شجن : كي باشوف .. أووووووو .. قده قرية فوق جبل الفرس .. حتى خططوا أرضية المعبد وسنا كهوف البوميس.. وربي مباودين .. دي مصيبة كبيرة باتقع فوق ريوسهم وريوسنا..

عبدالقوي  : أيش من مصيبة يا خالة .. الناس تشتي تعيش..

نادية شجن : يا عبدالقوي خلي يجي سيل زي السيل حق 93 وشوف أيش بيقع لهم دونا اللي طلعو الجبال يبنو .. والمصيبة نحنا اللي بنروح فيبه ..  المجاري حق السيلة كله سدونه ولعبو بالدنيا لعب .. وقده بيوتنا كما الويفر من أيام شبكني شبك ولا اترممت .. أقرب سيل بيبزهم وببيبزنحنا معاهم للداهوفة. 

عبدالقوي : بس يا شجن .. بطلي المعقلة .. إقتلبتيلي لبيبة .. لو إنتي ماتشتيش تعيشي .. خلي الناس تعيش..

نادية شجن : سكته خلينة أغلق المسح الميداني حقي .. أوووو .. ميدان الهوكي قسمونه بقع .. وأيش دا !! كلية الآداب خططونه .. لاااااا أبو الخضرة قد يخطط الجلي حق بيتي يجعله كسر بيده .. وربي أجت لي السومة ..

عبدالقوي : صدقتي إنك هبله يا خالة نادية .. مش قلتلك من سبق لحق ..

نادية شجن : خلاص دي اليومتين اللي عنده مبدأ ومحترم نفسه قده أهبل !! .. عادنحنا نعايب على الجماعة اللي أجو من برع عدن يبسطو عليها .. رجعنا نحن أهله وناسه كل من قرح معه القات خطط له بقعة وبنى..

عبدالقوي : فرصة والدنيا بلا أمن ولا في حكومة .. الناس تعابا بلا بيوت ودي أرضنا .. نبسط نحنا على الأرض وإلا يبسط عليها الغريب؟ .. خلينحنا نفرض أمر واقع..

نادية شجن : يا قهري عليك يا عدن .. يا حرقة قلبي عليك يا عدن .. سهير يا بنتي حميلي مي مليان دست وطلعيلي الدست وهو يفور ..

عبدالقوي : خير .. أيش بتنجحي يا شجن ؟؟

نادية : با نجح الصلعة حقك يا عبدالقوي .. لو ما تبزش شماطيرك وتتحرك من جنب بيتي باسكب المي وهو يفور فوق راسك لما أجيب أجلك..

عبدالقوي : كدا يا شجن .. تسخيبي؟؟

نادية شجن : أسخيبك ونص .. إنتا سخيت بعدن .. كيف ما تشتينيش أسخيبك !! 

عمرو جمال