أعور وعاده يتنقور !!

نادية شجن : كيفكم .. أيش أخباركم .. خالتكم نادية اليوم تعبانه و حالته حاله .. فيبي شقيقة مسكتني له يومتين .. لكن يجعله حبه حيث ما يوجعه كل من يقرح رصاص وطماش طول الليل  .. لا عاد كان زواج ولا فرحة لا قده بتدبش البلاد دبيش ..  أوووو مني دي؟ مشيته كما مشية الست عواطف جارتي .. كي باتأكد بالناظور حقي .. أيوة هي بشحمه ولحمه ومعه ابنه عبودي .. 

 عواطف : كيفيك يا خالة نادية، وكيف صحتك؟

نادية شجن : الحمدلله يا عواطف يابنتي .. كيفيك إنتي؟

عواطف: الحمدلله على كل الحال .. معانا دي اليومتين امتحانات عبودي حق الثانوية العامة .. 

نادية شجن : أيش الامتحانات بدأت؟

عواطف : لا .. بتبدأ يوم السبت .. والله قدنحنا على أعصابنا .. نفسي بتطلع من الفجعة.

نادية شجن : ليش الخوف يا عواطف .. عبودي ما شاء الله يبان عله أسد .. وانتي ما شاء الله ست محترمة ومربية فاضلة والأستاذ جلال مدرس جامعي محترم .. يعني ابنكم أكيد بيطلع لكم وبيجي من والأوائل صح وإلا أني غلطانة يا عبودي ..

عبودي : يا خالة نادية .. خلي لي حالي أنا أشتي اتخارج وانجح .. ولا أشتي أجي أول ولا عاشر..

نادية شجن : أوووو شوفو على قوارة .. عادني قلت نعم برفع من معنوياتك .. من صدق جزا المعروف سبعة كفوف .. أني دارية أنك لا تشتي تنجح ولا أم الصبيان .. أنت تدورلك حق القات عشان تجلس بالركن لما فجر ربي تخزن وتهبله كرع وحبوب من حق فهمي صاحب الصيدلية وهات يا هدرة بالتلفون من  فلانه لا علانه.

عواطف : وانتي مركزة على دي الحاجات كله.. حافظة جدول عبودي حفظ.. عيني عليك باردة يا نادية.

نادية شجن : الله أكبر .. كُع بعينك .. قدك عارفه إني جالسة بالتاقة دي ما افارقيش .. أني والناظور حقي .. قدهم يسمو طاقتي برج المراقبة.

عواطف : مله ما تتعبيش .. ما تجوعيش .. رجولك مايوجعونكش ما يطلعبهمش دوالي؟

نادية شجن : الجوع ووجع الرجول مقدور عليهم يا أمي .. لكن أيش يبرد قلبي لا راحت عليا خبارة كدا والا كداك..

عواطف : صدق اللي قال .. الشجن قتل العجوز ..

نادية شجن : عجوز بعينيك يا مدهرة .. أووووو ايش دي الورق اللي تتفالت من الكيس اللي بيدك ..يا عبودي الحق امك .. ورق صغار يتطايروا من الكيس حقه.. أيش دي المنشورات يا عواطف؟؟.. قدك توزعي منشورات يا عواطف؟؟

 عواطف : أص سكته يجعلك سلاخ بحنجرتك يا نادية  بتحنبي لي .. أيش من منشورات  .. دي أوراق خاصة .. مش شغلك فيبه..

نادية شجن : إلا شكله منشورات لااااا بعيد .. طلعتي مُسيسة يا خبيثة ولا تقولي لي..

عبودي  : بطلي المسامير حقك يا خالة نادية .. دي براشيم حق الامتحانات مش منشورات..

نادية شجن : برا .. أيش؟؟

عواطف : يجعلك كسر بلقفك يا عبودي .. ولا شي يا نادية .. يلا مع السلامة..

نادية شجن : براشيم يا عواطف ؟؟ دا وانتي مربية فاضلة وزوجك مدرس جامعي .. أيش بقيتو للجهلة.

عبودي : خليلي حالي يا خالة قده الدنيا كله تغش .. والمدرسين يرتشو .. والتدريس رمة الرمم .. وبالآخير اللي معه واسطه هو اللي بيتوظف وانا جيزي ..

نادية شجن : بس .. لا هنا وكفاية .. مشتيش أسمع خبارة جيزي جيز الناس اللي طلعتوا لنا فيبه دي اليومتين .. وربي عيب يا عواطف منشان كدا عدن خربت والبلاد كله ضايعه .. لا عاد في مدرس كما الناس ولا مهندس يشرح القلب ولا دكتور يطيب جرح .. الدنيا غش في غش وكلنا نساعد من راس الدولة لما أصغر مواطن .. نحن خربنا بلادنا بيداتنا..

عبودي : بس المزايدة يا نادية شجن .. لا تفعليش نفسك شريفة مكة .. شوفي بارقعك بحجرة لما اكسر الناظور حقك..

نادية شجن : تفعله يا عبودي .. أخلاقك وأعرفه .. والعيب مش عليك .. العيب على التربوية اللي واقفة جنبك .. وعلى قولة المثل أعور وعاده يتنقور.

عمرو جمال