النفس بالقلوب !!

 نادية شجن :  دلا دلا بعمرك يا أم الخير .. محملة كل دي الحاجات .. مو تحسبي نفسك جاهلة .. قدك حرمة كبربر يا أمي..

 أم الخير :  أوو نادية أني أفداليك كيفيك يا أمي .. مكانك وإنتي بالطاقة ولا بطلتي هذا الطبع؟

نادية شجن : 24 على 24 تقولي صيدلية .. ما اقدرش يا أم الخير مدمنة .. لو تروح عليا خبارة كدا والا كدا بيجيلي القرنقح والسعال الديكي.

أم الخير : الله يعنيك يا أمي .. 

نادية شجن : بعدين ما شاء الله .. ما شاء الله .. أيش دي الأكياس كله .. خضرة وصيد وحبحب كمان .. خاف ورثتي يا أم الخير وأني مش داريه .. 

أم الخير  : مو من ورث يا نادية .. أيش شفتيني بنت باشنفر ؟ .. قدك دارية بالخيط ورباطه .. القصة وما فيها إنه ابني علوي هو وعياله ومرته عندي بالبيت دي اليومتين .. قمت اتسلفت عشان أنجح لهم غداء مسوي..

نادية شجن : أووو غدي ينفضكم .. الله يهديك .. بتغديهم الحاصل.. قدك تضربي القملة بصميل يا أم الخير .. لماهو كل دي المزايدة؟

أم الخير : عيب .. مايقعش .. يا خزا البلا .. خاف تشتيني أغديهم صانونة الهوا ؟ 

نادية شجن : اني بس اهم كيف بتسددي كل الديون اللي فوق راسك؟ وانتي هبيتيله كلع من شق وطرف.

أم الخير : يا شيخة .. ربك بيدبره  من عنده .. اهم شي عندي ربنا يفرج على علوي ويحصل بيت جديد، مسكين هو وعياله كابي كُبيه بالبيت عندي .. اتفرج عليهم آخر الليل وهم رقود وأهبله "آي آي" لما يأذن فجر.

نادية شجن : أيييش ؟؟ تشتي تقولي لي إن علوي ومرته وعياله نقلو عندك للبيت؟؟

أم الخير : أيوة مساكين .. صاحب العمارة كردهم من الشقة .. يجعله حبه حيث ما يوجعه رفع عليهم الإيجار 45 ألف ريال.

نادية شجن : مكسور الناموس ..

أم الخير : وانتي داريه .. المشاهرة حق علوي كله بكله 40 الف .. بتكافي أيش وإلا أيش؟ .. أكل وشرب ومصاريف وفواتير .. على ما قصت لي مرت علوي نعم إتضاربو هو وصاحب العمارة لما رعفه .. ويا دميان شرّت وشرشرت ..

نادية شجن : يا قهري عليك يا أم الخير .. 

أم الخير : ولا قهر ولا شي .. ربك معانا وعلوي ابن حلال ومصلي وربنا ما ينسيش عباده ..

نادية شجن : ونعم بالله .. بس كيف بتسوو أني أشتي أفهم .. بيتكم مخزن ودارة .. علوي ومرته واثنين عياله وانتي عيالك أربعة يعني كلكم تسعة نفوس .. حتى النازحين حق ابين مش زيمكم..

أم الخير  : لا تكاربيهاش عليا يا نادية .. قدني قهرانة على ابني لا عاد تزيديش توجعيلي قلبي عله..

نادية شجن : أني قهرانة عليك إنتي .. أهم كيف باتتحملو بعض بهذا الحمى اللي يخلس الديم خلس.

أم الخير : لو عليا أني عادي .. النفس بالقلوب يا نادية .. أني بس اقهر لما أحس إنه ابني مقيد بالبيت ونفسه مكسورة..

نادية شجن : النفس بالقلوب؟؟ مو من قلوب دي اللي توسع تسعه نفوس؟

أم الخير  : قلبي يا نادية يوسع مية نفس .. اللقمة با تتدبر .. والبيت بيلم وربك بيعين.

نادية شجن : اللي يعجبني فيبيك يا أم الخير .. إنك راضيه وقنوعه ومتحمله .. 

أم الخير : الحمدلله على كل حال .. بنعترض على قدره؟؟ .. والدنيا لوضاقت ما بتضيق بيوتنا .. ولو اجا يوم وضاقت بيوتنا ما بتضيق عدن .. كفت الهلا والملا .. ما بتكفيش عياله؟؟ .. خليها على الرزاق الكريم وهي بتفرج يا نادية..

نادية شجن : روحي ربنا يفرجه بوجهك يا شيخة .. دام قلبك واسع كدا .. عمره ما بيضيق عليكم لامخزن ولاداره..

عمرو جمال