شمسي قمري !!

نادية شجن : يا سهيييير كي طفي التلفزيون والإداعة ولا أشتي أسمع شي .. أووو .. لا عاد كانا ولا كونه أخبار .. كل واحد ينزل الخبر على مزاجه .. مو مانفهمش؟ مو هبل؟ مو ما نستضيش؟ يزيدو على من ؟؟ وبعدين يتقلبو قلاب كما الباغة .. ولا يتبتو على موقف .. شمسي قمري ..  لكن حرام ما يفتك التلفزيون ابن الحرام دا مرة تاني .. أووو لكن كتروبه بلا حلا..

 سعيدة قلاب :  منو دونا اللي كتروبه يا نادية؟

نادية شجن : ياباهوت يابن علوان .. منو سعيدة قلاب ؟؟

سعيدة قلاب : أيوة .. كيفيك يانادية .. ايش اخبارك .. وكيف بنتك سهير .. والله فقدتلك .. وفقدت للحافة .. وفقدت لنرجس وماهيتاب وحواء .. وايش أخبار الأستاذ عيدروس؟  وممدوح ابن شفيقة كبر والا مكانه هفة؟  وفهمي صاحب الصيدلية مكانه يبيع كرع؟ و..

نادية شجن : بس وا سعيدة، جاهدك الرحمن .. فقدتي للحافة كله من ساسه لراسه. 

سعيدة قلاب : أيوة والله .. قدك داريه بي .. كنت زمان البس شيدري ومن بيت لابيت ولا أبقي بيت بالحافة الا لما اطمن عله..

نادية شجن : مو معرفيكش .. كلك كما زينب طيري .. تقولي تفلت لا لقفك..

سعيدة قلاب : هيا بخاطريك .. خليني أطير معي شغلات يشاله ويشا..

نادية شجن : خير ياطير ؟ لافين يا سعيدة؟ .. منو دا اللي أمه داعيه عله ؟؟

سعيدة قلاب : والله رايحة دحين لما ساحة الحرية اللي بكريتر في معاهم ندوة ولازم أحضره..

نادية شجن : أووو .. على قلبه .. مش إلا إنتي حراكية  لما النخاع؟ شفتك بالناظور حقي يوم الخميس وإنتي تهبيله بالمظاهرة برع برع يا استعمار .. مو يوديك لساحة الحرية.

سعيدة قلاب : ها ؟؟ أيوة ؟؟ يعني عادي أني مع الرأي والرأي الآخر..

نادية شجن : أني ما تفكدني وماتكبدني إلا خُبارة "الرأي والرأي الآخر" دي حق الجزيرة .. تزيدو على ميين يا أماه؟ على فرعون يا هامان ؟؟ روحي العبي بمكان تاني..

سعيدة قلاب : مالك يا نادية حامية عليا ؟.. أصبحي قبل ما اقوم أشترحبيك ملينات الحافة ..

 

نادية شجن : تشترحي بمن يا سعيدة قلاب .. بفضحك بكل ساحة وبكل ندوة وبكل مسيرة.. با خليهم يخبزونك ويعجنو..

 سعيدة قلاب : هيا هُش .. تفضحيني ليش ؟؟ حبيبتي يد ما تسرق ماتخاف..

نادية شجن : استحي على وجهك .. تخرجي من مظاهرة الحراك .. تقفزي لمظاهرة التغيير  .. تطيري تحشي بساحة كريتر على ساحة المنصورة .. وتهبعي جري لمخيم الميدان تفتني على مخيم الشيخ.. لكن ربي يهدك..

سعيدة قلاب  : أني يا مجرمة .. أني إلا حمامة سلام .. أوفق راسين بالحلال ..

نادية شجن : إنتي حمامة ؟؟ لو إنتي حمامة كيف الغربان؟ .. يا غراب البين..

سعيدة قلاب : نادية .. أقولك إهجعي أحسن لك..

نادية شجن : إهجعي إلا إنتي .. وقوليلي أيش كنتي تسوي أول أمس بالمجلس المحلي مع أصحاب المؤتمر الشعبي العام ؟؟

سعيدة قلاب  : ها ؟؟ .. أني ؟؟ .. وربي إنك كدابة يا عجوزة يامخرفة.

نادية شجن : أص أصه يجعلك قطع بلسانك عادك تحلفي كدب يا منافقة .. شفتك بالناظور حقي ماحد قاللي ..

سعيدة قلاب : مش شغلك .. أروح حيت ما يعجبني .. أهم شي مبادئي ما يهزه ريح ..

نادية شجن : حيابك يا أم المبادئ .. قد شفتك بعد ما نزلتي من المجلس المحلي .. طلعتي مقر الإصلاح .. وخرجتي من هناك لساحة الحراك .. دلا دلا بنفسك تتقلبي أخص من الخبز فوق الطاوة.

سعيدة قلاب : دحين أنتي أيش تشتي ؟؟

نادية شجن : ولا شي يا أمي .. بس مفكودة منك .. حرقتني خطبتك العصماء في ساحة المنصورة وانتي تطالبي الناس يقاطعو الإنتخابات .. وتاني يوم لبستي البرقع ورحتي تشتغلي بالدائرة الانتخابية .. ربي ينقفك من عنده يا مصيبة المصايب.

سعيدة قلاب : كملتي كلامك .. بردتي قلبك .. هيا أني حرة .. باتقلب زي ما اشتي طالما البلاد مليانته هبل يصدقوني .. بخاطرك يا شجنجن..

نادية شجن : ربي يزيليك من عنده إنتي واللي زيك .. محد خرب الدنيا وجلس على تله إلا أنتو .. ماكذبش من سماكم شمسي قمري.

عمرو جمال