سنفور غضبان !!

نادية شجن : الدنيا حلوة وأحلى سنين .. بنعيشها و إحنا يا ناس عاشقين .. ننسى الي فاتنا ونعيش حياتنا عالحب متواعدين.

 مجدي :  بس بلا هباله .. حب ومحبابة وهدرة فاضي.

نادية شجن : أووو منو دا اللي قام من صبح ربي متوحم عليا.. مجدي ابن نبيهة المعقله .. مالك وا أبي حامي عليا؟

مجدي : خلي لي حالي يا خالة نادية قدنا ضبحان من قلب أمي.

نادية شجن : من يومك وأنت مكاشر وضبحان  .. قول لي أيش أخبار أمك ؟؟ 

مجدي : تعبانه شكله تنازع وبتموت.

نادية شجن : يا حافظ يا حفيظ .. مالك كدا أعوج .. جالس تفاول على الحرمة .. لو تعبانه وإلا فيبه شي قولي .. بلبس شيدري وبنزل نوديها الهوسبتال.

مجدي : المستشفيات حقنا من حق أم الجن .. الحرمه تنازع وهم بيعجلو بزواله .. خليها تموت له بالبيت أحسن ولا الخسارة.

نادية شجن : مفتري .. ربي يهدك .. جبت أجل الحرمه من العدم ؟؟ مالك اليوم كدا شكلك مش طبيعي .. أيش في حاجة استوت بالشغل؟

مجدي : الشغل ؟؟ أيش من شغل يا خاله نادية .. انتي تسمي المهلكة اللي أروحه كل يوم دي شغل؟؟ 

نادية شجن : الله يكربك .. مالك كدا .. تشتي تكربني ؟؟ .. احمد ربك غيرك ما حصل .. معك وظيفة ومزوج ومرتك حامل والحمد لله..

مجدي : زوجة هرمه، لوكه، تشتينا جنبه 24 ساعة، كملتنا مصاريف وعاده قامت تحبل ياريتنا ما تزوجته .. كان ربي يشلنا قبل ما اتزوجه واتحنب هذي الحنابه .. 

نادية شجن : مله ربي يجعلك مجدي بعيونك التنتين .. حتى بنت الناس هبيتله مليان ديمه .. وابنك اللي عاده مادلقنوش أمه قدك حامي عله .. أيش من رجال نقمه إنت؟ .. تفاءل خير وخلي عندك إيمان بالله..

مجدي : ياشيخه أيش من تفاؤل داخل دي البلاد .. بلاد ملعونة ولا بتتصلح .. لو عشنا مليون سنة وربي ما تتصلح ..

نادية شجن : بس سكته .. سودته بوجهي؟؟

 مجدي : هي سوداء من يومه وبتجلس سوداء لأبد الآبدين .

نادية شجن : كيف أسويبه دا الليد حرقني .. يا ابني البلاد باتتصلح فيبك وبالشباب اللي زيك..

مجدي  : أيش من شباب ؟؟ كلهم سرق ومرتزقه. 

نادية شجن : لا إنتا هوبليس كيس .. لا عمري شفتك تضحك ولا حتى هبيتله ربع ابتسامه ..

مجدي : وليش البهدلة والخروعة والمزايدة.

نادية شجن : الضحكة والبسمه قدهم بهدله وخروعه ومزايده؟؟ طيب لاتضحكش بوجه الشبيله السرق والمرتزقه على قولتك .. ابتسم بوجهي مره كبيرة والا مانستاهلش نحنا العجيز منك ابتسامه؟

مجدي : ابتسم بوجوه الكبار ليش؟ محد باع البلاد وضيعه إلا انتو ..

نادية شجن : أني من بعدك بنتحر بجدل بنفسي من جبل صيرة والله ..

مجدي : احسن لك .. بترتاحي وبتريحي .. المفروض كلنا ننتحر ونرتاح .. مافيش حل إلا دا..

نادية شجن : أووووو .. حتى سنفور غضبان مش زيمك ..  كي روح من قدامي .. رووووووووووح ربي يناصلك مناصله من عنده .. كاربته بوجهي إلهي يكاربه بوجهك فوق ما انت مكارب ..

عمرو جمال