باب شَبك .. باب حديد !!

نادية شجن : منو دا اللي جالس يدقدق تحت بيتي ؟ خاف أصحاب القاعدة وصلو الحافة ؟؟

معتوق : لا قاعدة ولا قايمه ..

نادية شجن : أووو معتوق .. أيش معك الدقوق دا كله ؟ .. لو تبني الصهاريج ما بتدقش كدا..

معتوق : خليك اللكاعة يا نادية .. خلينحنا نكمل شغلنا كما الناس .. بلا وجع راس.. 

نادية شجن : أيش تسوي؟؟ قتلني الشجن يا معتوق.

معتوق : أكيد بيقتلك الشجن .. وإلا كيف بتكوني نادية شجن؟؟ 

نادية شجن : أيش دا ؟؟ باب حديد ؟؟ والله خرجت البيسه يا معتوق .. دا وإنت مكانك تتماوت..

معتوق : الله أكبر .. أشوفك بتبركينا يا نادية.

نادية شجن : أوووو على مزايد .. ببركك على ماهو ؟؟ خاف بمرع شعرك الأصفر وإلا عيونك الزرق .. لا تخافش، عيني بارده من يومه يا نخصي..

معتوق : ماتصدقي تلاقي موضوع وتجلسي تعجني وتعصدي فيبه .. أنا اتسلفت بيس واشتريت هذا الباب الحديد .. خلااااص ما فيش أمان يا نادية .. 

نادية شجن : يا باهوت يابن علوان .. أيش في يا معتوق ؟ الدنيا عاده بخير وعدن من يومه أمن وأمان..

معتوق : عادك ذاكرة يا نادية .. دا كان زمان .. وقول يا زمان أرجع يا زمان .. اسمعي كلامي وبدلي بابك حديد .. الحقي نفسك..

نادية شجن : بابي خشب شَبك وبيقي طول ما أني عايشة شَبك .. ربك بيسلم يا معتوق ولا في شي .. قول إلا انتو بعتو عدن وركبتو ابواب حديد وطوق المنيوم .. كل ما اخرج السوق وأتلفت دار مادار ما عاد أشوفش عدن .. أشوف بلاد تانية كله بردين وحديد وألمنيوم.

معتوق : أجينا للمحاضرات حق نادية المعقله .. أنا كلمتك ونصحتك بعدين لما بيكسرو بابك الشَبك أذكري كلامي وخلي عدن تنفعك.

نادية شجن : دحين مو جابه دي الهدرة كله؟

 معتوق : يا نادية البلاد حاله مش سوا .. كثرو المحببين والمحششين والمسلحين .. كل يوم قتيل هنا وقتيل هناك .. فلان سرقو بيته .. فلان ضربو ابنه ... علان اقتحمو بيته .. أيش ما تسمعيش أخبار؟ .. متقريش جرايد؟ .. ما تفتحيش الفيسبوك؟

نادية شجن : إلا أسمع وأشوف كل شي بس أتعامس .. مشتيش أصدق اللي أشوفه وأسمعه..

معتوق  : تسمعي الرصاص يا نادية .. عادنحنا ما غلقناش كلام وقد قرحت .. أيش دراهيك دحين ليش دا الرصاص كله .. عرس؟ .. مباراة؟ .. حرب ؟ والا أيش؟؟

نادية شجن : وجعتلي قلبي يا معتوق .. 

معتوق : كلنا قلوبنا موجوعة بس أيش نسوي؟ دا أمر واقع ولازم نتأقلم معه..

نادية شجن : لا يا معتوق .. ما نتأقلمش معه .. أكبر مصيبة لو أعتبرنا الوضع عادي وتأقلمنا معه..

معتوق : وأيش الحل يا أم العُريف؟

نادية شجن : فين الناس ؟؟ .. فين اللجان الشعبية؟ .. فين رجالك يا عدن؟

معتوق : على قولتهم نعم الرجال ماتو بـ 94 .. خليلي حالي يا نادية .. الواحد ما معه إلا يركب باب حديد وطوق حديد ويبند بابه على نفسه وعياله، محد فاضي لحد .. وعادنا كمان بسوي سقف حديد عشان الرصاص الراجع .. قد سيبنا لهم الشارع كمان أموت وأنا داخل بيتي .. يالله تصبحي على خير يا نادية.

نادية شجن :  معتوق .. خبي بابك الخشب بالريل، وغطيهو من الشمس .. بيجي يوم بنرجع نركب أبوابنا الخشب .. أما أني بخلي بابي شبك لما أموت .. ومادمت بعدن فأني محمية من رب العالمين.. 

عمرو جمال