طفي .. لصي !!

نادية شجن : الله بيزيلكم من عنده .. لكن يجعلكم الساحق والماحق والبلاء المتلاحق يا أصحاب الكهرباء..

زليخة : آآآآآمين،  مله بس كترووووبه بلا حلا .. 

نادية شجن : مله حرام عليهم ..  الدنيا حمى موت .. وعادهم يطفو الكهرباء 11 ساعة.. بنموت من الحمى والله ديمي اختلس خلس .. الصنافير من كدا..

زليخة : بعدين يعرفوا التوقيت الصح.. أول مالحمى يحشر، يداتهم تحكهم و هاتلك يا طفي لصي..

نادية شجن : عادني قلت باقوم باصبن .. وبطحن بسباس أحمر .. لكن يجعلهم طاحن يطاحنبهم من شق ومن طرف..

زليخة : مله وربي دوخوبنا .. أمس التلاجة حق جارتي حرقت .. وهم مساكين الله قدهم يضربوا القملة بصميل .. من فين عاد بيصلحونه.. وناهد بنتي قبل اسبوعين حرقت عليها الماكينة حق المكيف.. 

نادية شجن : حرام والله حرام الناس قدهم حتيف نتيف لا مخدة ولارديف .. فين عاد نروح .. نسرق .. ننهب .. نقفز بيت الجيران .. الباب مقفل .. والطاقة حديد ..

زليخة : والله الحال لا يسر عدو ولا حبيب .. وعاده بنات بنتي التوم .. معاهم امتحان تانوية عمية .. كيف بيسوو بالمراجعة .. العويلة قده لما تطفي الكهرباء ينزلو عند أقرب كامبة يراجعو .. بس البنويت كيف يسوو؟

نادية شجن : والله من صدق دايما بناتنا مظلومات .. في النور والا في الغداري مظلومات .. وعاده مايفكدني ومايمرضني ومايفقشلي المرارة حقي .. الا الشموع وأصحاب الشمع .. الشمعة تلصيها من هنا قالت سُح سُح سُح من هنا .. أو أو أو ذوبان فوري .. حتى الكبريتة تجلس لاصية أكثر منه..

زليخة : وعادهم مايستحوش .. أول كل شهر الأبيال توصل في الموعد ..كل البلاد مواعيده طيسي فيسي إلا الأبيال مواعيده إنجليزي..

نادية شجن : شفتي .. أمانة يجيبو السمرقع .. أما أني قدني لما يجي أبو الأبيال .. أراعيله بالسراج وقدني أندفه نديف وأخرج الغلايب كله فوق راسه مسكين .. أهم شي أرتاح..

زليخة : تاعس إلا فرحونحنا قليل بخليجي عشرين .. البلاد كانت كل كله تضاوي .. من ساسه لا راسه .. تدكري؟

نادية شجن : أيوة لا تدركينيش بخليجي عشرين .. أمانة كنت كل ما أروح زغط ألاقي مليان شجر يضاوو كما شجر الكريسميس ..

زليخة : أول ما خلص خليجي عشرين .. هبولنا كم يوم ورجعو يطفو الكهربا من جديد .. فرحونحنا كم شهر .. وبعدين رجعت حليمة لعادته القديمة..

نادية شجن : وانتي صدقتي إن الخير يطوّل مع دونا الناس .. خليجي عشرين كان بس عشان المنظرة قدام الأجانب، كل شي رقعونه من فوق فوق ولهفو المليارات .. دونا الشي الوحيد اللي أمينين فيبه "السرقة" يا أمي..

 زليخة : صدقك وا نادية .. بالسرقة ما فيش أحسن منهم .. رنججو العمايرحق الشارع الرئيسي من برع و أغلبه آيلة للسقوط..

نادية شجن : لا وعاده في معاهم خُبارة لا ترضي الله ولا رسوله ولا البشر ولا الكائنات الحية كله على كوكب الأرض..

زليخة  : أو أو أو .. مو من خُبارة دي؟

نادية شجن : تصدقي يا زليخة يا نخصي إنهم عادهم مايستحوش ويقولو انهم هم اللي بنو الشارع الرئيسي بخليجي عشرين .. 

زليخة : مش عقااااااااال .. يجعله كسر بلقفه اللي يقول كدا ..

نادية شجن : أني قدني مُجهزة بطرفي قارورة "أسيد" واللي يقول كدا بطفشه ساني .. أحرق وجهه ولا يحرق قلبي  ..

زليخة : صدق والله يفحروا القلب .. أيش دا أسمع صوت المراوح؟؟

نادية شجن : هيّا أخيرااااا لصو الكهرباء.. غطرفي يا زليخة غطرفي..

زليخة : هيّا الحمد لله .. بخاطرك يا ندو .. بطلع أطحن البسباس وإنتي أدخلي الحقي صبني قبل ما يقطعو الكهربا مرة تاني..

نادية شجن : زليخخخخخخة.. الحقيني يازليخخخخة..

زليخة : يا حافظ.. أيش في يا نادية مالك خير.. فجعتيني .. لماهو الصياح دا كله..

نادية شجن :  قطعو المي يا زليخة .. قطعو المي ..

زليخة : هيّا منه دا .. وهذي جلسه .. 

نادية شجن : دي ما عاديش عيشة يا زليخة .. لكن أمره لله من كان السبب .. قولي آمين وا زليخة ..

زليخة : آآآآآآآآآآآآمين..

عمرو جمال